წელს უსაფრთხო საცხოვრისი 10-მა ეკომიგრანტმა ოჯახმა შეიძინა

საკუთრების რეგისტრაციის პროცედურა ბათუმის იუსტიციის სახლში გაიმართა, რომელსაც აჭარის ჯანდაცვის მინისტრის მოადგილე, ედუარდ ნაკაშიძე ესწრებოდა.

"ეკომიგრანტი ოჯახების საცხოვრებლით უზრუნველყოფის პროგრამას სამინისტრო 2025 წელსაც აგრძელებს. საცხოვრისი თანადაფინანსებით პირველ ეტაპზე ათმა ოჯახმა შეიძინა. წელს ჯამში პროგრამით სტიქიის შედეგად დაზარალებული 120 ოჯახი ისარგებლებს. გამოყოფილია 6 240 000 ლარი" - აღნიშნა მინისტრის მოადგილემ, ედუარდ ნაკაშიძემ.

2025 წელს პროგრამაში განხორციელებული ცვლილების თანახმად, ბენეფიციარს საშუალება აქვს პროგრამის ფარგლებში გათვალისწინებული თანხით, საკუთრებაში რეგისტრირებულ მიწის ნაკვეთებზე, შესაბამისი მუნიციპალიტეტის მიერ გაცემული მშენებლობის ნებართვის საფუძველზე ააშენოს საცხოვრებელი სახლი.

სამინისტრო “ეკომიგრანტი ოჯახების საცხოვრებლით უზრუნველყოფის” პროგრამას 2016 წლიდან ახორციელებს, დღემდე პროგრამის ფარგლებში შეძენილია 859 საცხოვრებელი ფართი.